د امریکا ولسمشر ډونالډ ټرمپ وايي، د ایران پر وړاندې د پوځي اقدام پرېکړه یې د دې لپاره کړې چې تهران د اټومي وسلو ترلاسه کولو ته پرېنږدي.
نوموړي ویلي، د ایران پر وړاندې روانه جګړه به ډېر ژر پای ته ورسېږي او په خبره یې، خلک به د دې جګړې پایله وویني.
ټرمپ د تېلو د بیو لوړېدو ته په اشارې ویلي، د تېلو د بیو زیاتوالی د امریکا او نړۍ د امنیت د تأمین په بدل کې د منلو وړ او لږ لګښت دی.
نوموړي د یکشنبې په ورځ په ایووا ایالت کې د یوې غونډې پر مهال ویلي، د جګړې له پای ته رسېدو سره به د تېلو بیې په پام وړ توګه راټیټې شي، خو تر هغه مهاله د بیو لوړېدل د امریکا او نړۍ د امنیت د خوندیتوب په بدل کې د منلو وړ لګښت دی.
ټرمپ د جګړې د پای ته رسېدو لپاره کومه مشخصه نېټه نه ده ښودلې، خو ویلي یې دي چې دا جګړه به «ډېر ژر» پای ته ورسېږي.