پاکستاني خبریال عمران ریاض خان د دغه هېواد په سیاسي چارو کې د پوځ پر پراخ رول نیوکه کړې او ویلي یې دي، هر مهال چې پوځ د یوه منتخب حکومت پر وړاندې ودرېږي، رسنۍ هم د دروغجنو تبلیغاتو لپاره کارول کېږي.
نوموړي د ۱۹۷۱ کال پېښو ته په اشارې ویلي، چې پوځي جنرالانو د بنګالیانو د رایې حق محدود کړ او په دې توګه یې د پاکستان د تجزیې زمینه برابره کړه.
عمران ریاض خان زیاته کړې، چې ورته وضعیت اوس په خیبر پښتونخوا کې هم تکرارېږي او د پښتنو د سیاسي او رایې ورکولو حقونو د محدودولو لپاره زمینه برابرېږي.
هغه همداراز ویلي، هغه پښتانه چې د پاکستان د سختو شرایطو پر مهال یې د دغه هېواد دفاع کړې، اوس «ترهګر» بلل کېږي.
نوموړي خبرداری ورکړی چې په هر هېواد کې د پوځي جنرال د مشر په توګه منل کېدل کولای شي د هغه هېواد د ویجاړۍ لامل شي.