د امریکا ځانګړي استازي سټیو وېټکوف وایي چې امریکا به د نومبر په ۱۰مه او ۱۱مه د متحده عربي اماراتو په پلازمېنه ابوظبۍ کې د روسیې او اوکراین ترمنځ د خبرو منځګړیتوب وکړي.
د وېټکوف په وینا، په دغو خبرو کې به د جګړې له پای ته رسېدو وروسته د اوکراین امنیتي ترتیبات، د تاوتریخوالي کمول، بشري مرستې او د سولې هوکړې ته د رسېدو راتلونکي ګامونه وڅېړل شي.
نوموړي زیاته کړې چې امریکايي مذاکره کوونکي به په بروکسل کې هم د فرانسې، جرمني، بریتانیا، اروپايي ټولنې او ناټو له استازو سره وګوري او د اوکراین لپاره د امنیتي تضمینونو، د اروپا د راتلونکي امنیتي جوړښت او د اوکراین د بیارغونې په اقتصادي فرصتونو به خبرې وکړي.
د دې هڅو موخه د روسیې او اوکراین ترمنځ د جګړې پای ته رسول او د داسې هر اړخیزې او تلپاتې سولې هوکړې ته رسېدل دي چې د راتلونکو نسلونو امنیت تضمین کړي.