د بنګلهدېش د بهرنیو چارو وزارت مرستیال استازی محمد ثاقب صداقت وایي، د مکې تړون ته د دغه هېواد ورګډېدل کولای شي د یاد تړون جغرافیایي لمن تر سوېلي اسیا پورې پراخه کړي.
نوموړي د پاکستان «بزنس ریکارډر» ورځپاڼې ته ویلي، د بنګلهدېش غړیتوب به نه یوازې د تړون د اوسنیو غړو لپاره ګټور وي، بلکې د ګډو پوځي روزنو او دفاعي صنعت په برخه کې به هم د همکاریو زمینه برابره کړي.
د هغه په وینا، بنګلهدېش د ملګرو ملتونو د سوله ساتو ماموریتونو له مهمو مرسته کوونکو هېوادونو څخه دی او ګډون به یې د دغه تړون ظرفیت پیاوړی کړي.
تر دې مخکې د پاکستان د بهرنیو چارو وزیر اسحاق ډار ویلي وو، چې د اسلامي هېوادونو شپږو یا اوو هېوادونو د پاکستان، ترکیې او سعودي عربستان له پوځي تړون سره د یوځای کېدو لېوالتیا ښودلې ده.
همدارنګه، رویټرز د اګسټ په ۲۵مه راپور ورکړی و، چې د بنګلهدېش د بهرنیو چارو مرستیال وزیر همایون کبیر د دغه تړون بلنه مثبته ارزولې او ویلي یې وو چې سعودي عربستان بنګلهدېش ته د ګډون بلنه ورکړې ده.
په ورته وخت کې، د روان کال په مې میاشت کې رسنیو راپور ورکړی و، چې بنګلهدېش له پاکستان سره د چین او پاکستان په ګډه جوړو شویو «JF-17» جنګي الوتکو د پېرلو په اړه خبرې کړې دي؛ خو تر اوسه د داسې یوې هوکړې رسمي تایید نه دی شوی.
دا پرمختګونه په داسې حال کې دي چې ډاکه له اسلاماباد سره د دفاعي همکاریو د پراختیا هڅې هم کوي.