د امریکا د بهرنیو چارو وزارت په سعودي عربستان کې خپلو ځینو غیرضروري دولتي کارکوونکو او د هغوی د کورنیو غړو ته له دغه هېواده د وتلو امر کړی دی.
د راپورونو له مخې، دغه پرېکړه په سعودي عربستان کې د امنیتي اندېښنو او د یمن د حوثي ډلې له لوري د بریدونو د زیاتېدو له امله شوې ده.
د امریکا د بهرنیو چارو وزارت ویاند، ټامي پیګوټ، ویلي چې حوثي ډلې پر سعودي عربستان بریدونه زیات کړي، چې په کې پر ملکي هوايي ډګرونو او مهمو تاسیساتو بریدونه هم شامل دي.
د نوموړي په وینا، دغو بریدونو ملکي وګړو ته مرګژوبله اړولې او د تګ راتګ په برخه کې یې ستونزې رامنځته کړې دي.
نوموړي زیاته کړې، چې د امریکايي دولتي کارکوونکو او د هغوی د کورنیو د خوندیتوب ډاډ ترلاسه کول د دغه وزارت لومړیتوب دی او د هغوی د ساتنې لپاره به اړین اقدامات ترسره کړي.
دا پرېکړه وروسته له هغې شوې، چې په سعودي عربستان کې پر هوايي ډګر او د تېلو پر تاسیساتو په وروستیو بریدونو کې کسان ووژل شول او لس نور ټپیان شول.
د امریکا سفارت هم په ریاض کې د احتمالي نورو بریدونو په اړه امنیتي خبرداری خپور کړی دی.
که څه هم ځینو راپورونو د خلیج په نورو هېوادونو کې د امریکايي ماموریتونو د کارکوونکو د کورنیو د ایستلو احتمال هم یاد کړی، خو د امریکا د بهرنیو چارو وزارت ویلي، چې د رسمي وتلو امر یوازې په سعودي عربستان کې غیرضروري دولتي کارکوونکي او د هغوی کورنۍ رانغاړي.