د افغانستان اکثریت ګوند پر کونړ او پکتیکا د پاکستان د پوځ وروستي بریدونه په کلکو ټکو غندلي او هغه یې د افغانستان د ملي حاکمیت ښکاره نقض بللی دی.
دغه ګوند ویلي، پاکستان لا هم د ستراتیژیک عمق پخوانی سیاست تعقیبوي او د افغانستان د اوسني وضعیت له امله یې دغه سیاست لا پیاوړی شوی دی.
د افغانستان اکثریت ګوند دغه راز ویلي، چې په نړیوال نظام کې د بدلونونو له رامنځته کېدو سره ځینې سیمهییز قدرتونه نور پخوانیو نړیوالو اصولو او قوانینو ته ژمن نه دي او پاکستان هم له دې وضعیت څخه د خپلو پراختیا غوښتونکو سیاستونو لپاره ګټه اخلي.
ګوند همداراز د طالبانو حکومت او پاکستاني پوځ ترمنځ روانو نښتو او ترینګلتیاوو ته په اشارې ویلي، چې د دې وضعیت دوام یوازې د افغانانو په خاوره کې د ملکي وګړو کړاوونه او ستونزې زیاتوي.