د اسلامي همکاریو سازمان د سعودي عربستان پر مکې مکرمې او د مدینې منورې پر سیمې د حوثي ډلې وروستي بریدونه په کلکو ټکو غندلي دي.
دغه سازمان ویلي، د حوثیانو دا بریدونه ناوړه او له کرکې ډک دي چې هدف یې د ملکي وګړو وېرول او د اسلامي سپېڅلو ځایونو او جوماتونو حرمت ته سپکاوی دی.
د اسلامي همکاریو سازمان عمومي دارالانشاء په یوه اعلامیه کې ویلي چې د مکې مکرمې او د مدینې منورې سیمې په نښه کول، د سعودي عربستان پر وړاندې د حوثیانو د روانو بریدونو په لړ کې خطرناک اقدام دی.
دا څرګندونې وروسته له هغې کېږي چې سعودي چارواکو وویل، د دوی هوايي دفاعي ځواکونو د مکې مکرمې په جنوب کې د حوثیانو یوه بېپیلوټه الوتکه له دې وړاندې وویشتله چې د ښار ممنوعه هوايي حریم ته ننوځي.
خو حوثیانو د مکې د په نښه کولو ادعا رد کړې او ویلي یې دي چې د سعودي چارواکو ادعا ناسم تبلیغات دي.