د بغلان ولایت په مرکزي بغلان ولسوالۍ کې د طالبانو حکومت د امنیه قوماندانۍ د ترهګرۍ ضد ځواکونو په دوو کشفي عملیاتو کې ۲۹ میله بېلابېلې وسلې نیولې دي.
د بغلان ولایت مقام د رسنیو دفتر په یوه خبرپاڼه کې ویلي، په نیول شویو وسلو کې ۲۸ میله تومانچې او یو میل لاسي بمویشتونکی شامل دي.
د خبرپاڼې له مخې، دغه وسلې له هغو کسانو ترلاسه شوې چې ځانونه یې د وسلو ترمیمکاران معرفي کول، خو د وسلو د ترمیم ترڅنګ یې د هغو پېر او پلور هم کاوه.
د بغلان ولایت مقام د نیول شویو کسانو د هویت او برخلیک په اړه نور جزئیات نه دي خپاره کړي.