چین سپوږمۍ ته د درېیو فضانوردانو د لېږلو د خپل پلان جزئیات اعلان کړي او غواړي دغه ماموریت د ۲۰۳۰ کال تر مخه ترسره کړي.
د ګلوبل ټایمز د راپور له مخې، د دې ماموریت طرحه د بېجینګ په ښار کې د بشري فضایي څېړنو په اووم سمپوزیم کې وړاندې شوې ده.
د پلان له مخې، دوه «لونګ مارچ-۱۰» توغندي به په جلا جلا توګه وتوغول شي؛ لومړی توغندی به د سپوږمۍ د کېناستو وسیله مدار ته ورسوي او دویم به له درېیو چینایي فضانوردانو سره فضايي بېړۍ ولېږدوي.
وروسته به دواړه فضايي وسایل د سپوږمۍ په مدار کې یو له بل سره یوځای او ونښلول شي.
له دې ډلې به دوه فضانوردان د سپوږمۍ د کېناستو وسیلې ته ولېږدېږي او د سپوږمۍ سطحې ته به ښکته شي، څو علمي څېړنې ترسره کړي؛ درېیم فضانورد به په اصلي فضايي بېړۍ کې پاتې شي.
د څېړنو له بشپړېدو وروسته به دوه فضانوردان بېرته مدار ته پورته شي، له اصلي فضايي بېړۍ سره به ونښلول شي او په ګډه به ځمکې ته راستانه شي.