رویټرز خبري اژانس وایي، د روسیې ۴۰ زره مټریک ټنه ډیزل تېل لېږدوونکې یوه بېړۍ د امریکا د نیویارک ښار پر لور روانه ده او تمه ده چې د نومبر په اوومه دغه هېواد ته ورسېږي.
د کښتۍ د تګ راتګ د معلوماتو له مخې، د «اګیوی فانېنډېس» په نوم دغه بېړۍ چې د مالټا بیرغ لري، د اکتوبر په ۲۲مه د روسیې د بالتیک سمندرګي په پریمورسک بندر کې د ټیټ سلفر لرونکو ډیزلو په بارولو بوخته وه.
دا لېږد د روسیې د ولسمشر ولادیمیر پوتین او د امریکا د ولسمشر ډونالډ ټرمپ ترمنځ له شوې هوکړې وروسته ترسره کېږي.
د دغې هوکړې له مخې، روسیې هوکړه کړې چې د ډیزلو پر صادراتو لګول شوی خپل بندیز لرې او نړیوالو بازارونو، د امریکا په ګډون، ته د دې سونتوکي صادرات بېرته پیل کړي.
ټرمپ د اکتوبر په نهمه اعلان کړی و چې روسیه به په لومړي پړاو کې ۳۰۰ زره مټریک ټنه ډیزل صادر کړي، ورپسې به په نومبر کې ۵۰۰ زره ټنه او له هغې وروسته به یو میلیون ټنه نور ډیزل نړیوالو بازارونو ته وړاندې کړي.
د راپور له مخې، ټرمپ د امریکا د نومبر د درېیمې منځمهاله ټاکنو تر مخه د ډیزلو د بیو د راټیټولو لپاره یو لړ اقدامات کړي دي.
په دغو اقداماتو کې د روسیې پر وړاندې د نوي بندیز قانون د ځینو برخو ځنډول او پر اروپايي هېوادونو د ډیزلو د صادراتو د بندولو ګواښ هم شامل دی.
د روسیې د لومړي وزیر مرستیال الکساندر نوواک ویلي، دغه هېواد به د روان کال تر پایه د ډیزلو صادرات په میاشت کې له درېیو څخه تر درې نیمو میلیونو مټریک ټنو پورې لوړ کړي؛ دا هغه کچه ده چې روسیې په عادي شرایطو کې صادروله.
روسیې د اوکراین د جګړې له امله پر روسي نفتي محصولاتو د اروپايي ټولنې د وارداتو د بشپړ بندیز له پلي کېدو وروسته، خپل ډیزل تر ډېره برازیل، ترکیې او یو شمېر افریقايي هېوادونو ته صادر کړی دی.
د رویټرز په وینا، د روسیې د ډیزلو د صادراتو بیا پیل ښايي د نړیوالو بازارونو د سونتوکو پر عرضې اغېز وکړي، خو د دغو صادراتو وروستی اغېز به د بازارونو له غوښتنې او د بیو له بدلونونو سره تړاو ولري.