د طالبانو حکومت د بهرنیو چارو وزارت ویاند عبدالقهار بلخي ویلي، د جرمونو نړیوالې محکمې له لوري د شیخ هبت الله او یو شمېر نورو چارواکو د نیولو د امر صادرولو بهیر د افغانستان په اړه د نړیوالو قضايي بنسټونو د بېطرفۍ او اعتبار په اړه جدي پوښتنې راپورته کوي.
بلخي په یوه اعلامیه کې ویلي، چې د طالبانو حکومت له یادې محکمې سره هېڅ ډول همکاري او تعامل نه لري او د دې محکمې پرېکړې د افغانستان په اړه د سیاسي موخو له مخې بولي.
نوموړي ټینګار کړی چې د طالبانو حکومت د جرمونو نړیوالې محکمې صلاحیت او پرېکړې نه مني.
هغه زیاته کړې، د جرمونو نړیوالې محکمې وروستي اقدامات د افغانستان په اړه د نړیوالو قضايي او سیاسي چلندونو د بېطرفۍ په اړه شکونه لا زیاتوي.
د یادونې وړ ده چې څو ورځې وړاندې د جرمونو نړیوالې محکمې د طالبانو حکومت پر مشر شیخ هبت الله اخندذاده، د سترې محکمې مشر عبدالحکیم حقاني، د معارف وزیر حبیب الله اغا او د لوړو زده کړو پر وزیر ندا محمد ندیم د نیولو حکم صادر کړی و.