د طالبانو حکومت د احصایې او معلوماتو ملي اداره وايي، د روان لمریز کال په لومړیو شپږو میاشتو کې د هېواد له رسمي سرحدونو او هوايي ډګرونو څخه شاوخوا ۱۵ زره او ۴۴۹ بهرني وګړي افغانستان ته داخل او له هېواده بهر شوي دي.
د معلوماتو له مخې، په دې موده کې ۸ زره او ۵۳۸ بهرني وګړي افغانستان ته داخل شوي چې ۳۴۹ یې ښځې وې.
همداراز ۶ زره او ۹۱۱ بهرني وګړي له افغانستانه وتلي چې ۱۹۷ یې ښځې وې.
د احصایې ادارې په وینا، له افغانستان سره د ځمکنیو لارو د تګ راتګ شمېر تر هوايي سفرونو ډېر و؛ ۸ زره او ۴۳۷ کسان د ځمکنیو سرحدونو له لارې او ۱۰۱ کسان د هوا له لارې هېواد ته داخل شوي دي.
د ادارې د معلوماتو له مخې، له راغلو بهرنیانو څخه ۹۳۱ کسانو د افغانستان د تاریخي او لرغونو سیمو د لیدنې لپاره سفر کړی و، خو پاتې کسان د کار په موخه هېواد ته راغلي دي.
نیمروز د بهرنیو وګړو د داخلېدو تر ټولو ډېر شمېر ثبت کړی، چې ۵ زره او ۳۴ کسان پکې شامل دي.
ورپسې هرات دی چې د ځمکنیو او هوايي لارو له لارې ۲ زره او ۶۵۹ بهرني وګړي ورغلي دي.
پاتې کسان د فاریاب اقینې، بدخشان اشکاشم، کندهار سپین بولدک او بلخ حیرتان له لارې افغانستان ته داخل شوي دي.