د امریکا د حکومت د عمومي پلټونکو په یوه تازه رسمي ارزونه کې ویل شوي چې له ایران سره د جګړې پر مهال د پرمختللو وسلو او مهماتو پراخ استعمال د امریکا په پوځي زېرمو کې ستراتیژیک کمښت رامنځته کړی دی.
د راپور له مخې، د امریکا دفاع وزارت اوس هڅه کوي د وسلو د تولید او پېرلو بهیر چټک کړي، د تولید وخت راکم کړي او د مهمو خامو موادو، پرزو او مهماتو زېرمې زیاتې کړي.
راپور وايي، امریکا د جون تر ۲۹مې پر جګړې شاوخوا ۳۳.۴ میلیارد ډالر لګولي، چې نږدې دوه پر درېیمه برخه یې د کارول شویو مهماتو لګښت جوړوي.
د راپور له مخې، ۳.۷ میلیارد ډالر د له منځه تللو پوځي تجهیزاتو لپاره ځانګړي شوي دي.
په جګړه کې د امریکا پوځي زیانونو ته هم اشاره شوې او ویل شوي چې ۳۰ MQ-9 ریپر بېپیلوټه الوتکې، اووه KC-135 هوايي سونتوکي وړونکې الوتکې، څلور F-15E، یوه F-35A او یوه A-10 الوتکه له منځه تللې یا زیانمنې شوې دي.
د راپور له مخې، په بېلابېلو هېوادونو کې د ایران د توغندیزو او بېپیلوټه بریدونو له امله د امریکا پوځي تاسیساتو ته هم درانه زیانونه اوښتي دي.
ارزونه ښيي چې په عراق، کویت، سعودي عربستان او متحده عربي اماراتو کې د امریکا ډیپلوماټیکو تاسیساتو ته شاوخوا ۱۸۴ میلیون ډالر زیان اوښتی او نږدې ۹ زره امریکايي وګړي له جګړهځپلو سیمو ایستل شوي دي.
د راپور له مخې، په ټوله جګړه کې ۱۱ امریکايي پوځیان په پوځي عملیاتو کې وژل شوي او له یوه بل سرتېري سره یوځای، چې په غیرپوځي پېښه کې مړ شوی، د امریکايي پوځیانو ټول تلفات ۱۲ کسانو ته رسېږي.