د بریتانیا پخوانی لومړی وزیر بوریس جانسن وايي، د پاکستان پخوانی لومړی وزیر عمران خان له درېیو کلونو راهیسې په سختو او غیرانساني زنداني شرایطو کې ساتل کېږي.
د جانسن په وینا، خان په یوه کوچنۍ، له حشراتو ډکه او بېکړکۍ کوټه کې په انفرادي بند کې دی، د مناسبې درملنې له ځنډ وروسته یې د ښي سترګې ۸۵ سلنه لید له لاسه ورکړی او د ملګرو ملتونو د شکنجې د ځانګړي راپور ورکوونکي له خوا یې د زندان شرایط څو ځله غندل شوي دي.
جانسن ادعا کوي چې عمران خان له واکه تر لرې کېدو وروسته له ګڼو قضیو سره مخ شوی چې ډېری یې پای ته رسېدلي، خو د القادر ټرسټ قضیه لا هم روانه ده او خان یې محکومیت استیناف کړی دی.
هغه استدلال کوي چې که د قضیې تورونه حتی سم هم وي، دا د داسې سختو زنداني شرایطو د توجیه لپاره کافي نه دي او د خان د استیناف قضیه باید ژر او د یوه خپلواک محکمه له خوا واورېدل شي.
نوموړی عمران خان د پاکستان له سترو کرکټي اتلانو څخه بولي او یادونه کوي چې خان په ۱۹۹۲ کال کې پاکستان د کرکټ نړیوال جام اتلولۍ ته رسولی و. جانسن همداراز وايي، خان د ښځو د سواد، تعلیم او چاپېریال په برخو کې ځینې مهمې هڅې کړې وې، که څه هم د هغه پر ځینو بهرنیو او سیاسي دریځونو، لکه د روسیې او طالبانو په اړه، نیوکې لري.
جانسن په پای کې ادعا کوي چې د عمران خان د اوږدې بندیز تر شا اصلي لامل د پاکستان د پوځ وېره ده چې د هغه له خوشې کېدو سره به د خان میلیونونه پلویان یو ځل بیا د هغه ملاتړ وکړي. هغه د پاکستان د حکومت چلند سخت غندي او وايي، بریتانیا باید د خپل نفوذ په کارولو سره د عمران خان د عادلانه محاکمې او د هغه د وضعیت د ښه کېدو لپاره ډېر جدي فشار وارد کړي.