د پاکستان دفاع وزیر خواجه اصف پر تحریک انصاف نیوکه کړې او ویلي یې دي چې له ۱۳ کلونو راهیسې په یوه ایالت کې لوټمار روان دی، خو لا هم بسنه نه کوي.
خواجه اصف ویلي، تحریک انصاف هره دویمه ورځ پر مرکزي حکومت د بریدونو لپاره تیاری نیسي او باید د خیبر پښتونخوا د ۱۳ کلونو حساب هم ورکړي.
نوموړي د سومنات معبد په اړه په اشارې سره ویلي، پر سومنات ۱۷ ځله بریدونه شوي وو او باید وشمېرل شي چې تر اوسه څو بریدونه شوي او څو پاتې دي.
هغه زیاته کړې، تاریخ ښيي چې پر سومنات ولې بیا بیا بریدونه کېدل، خو اسلاماباد سومنات نه دی.
نوموړي تحریک انصاف ته په خطاب کې ویلي چې په سوچ او فکر دې اسلاماباد ته راشي، ځکه هلته به څه ترلاسه نه کړي، بلکې باید څه ورکړي.
دا څرګندونې وروسته له هغې کېږي چې د پاکستان تحریک انصاف مشر جنید اکبر ګواښ کړی و چې د سپټمبر په ۲۷مه د اوږده لاریون پر مهال به اسلاماباد په «سومنات» بدل کړي.