د پاکستان کرکټ بورډ خپلو لوبغاړو ته د افغانستان په غوره لیګ کې د ګډون اجازه نه ورکوي او په دې تړاو یې د سفر مخه هم نیولې ده.
د پاکستان «نېشن» ورځپاڼې د راپور له مخې، د دغه هېواد کرکټ بورډ خپلو ملي لوبغاړو ته ویلي چې د افغانستان په غوره لیګ سیالیو کې ګډون نه شي کولای.
راپور کاږي، چې د پاکستان د ملي لوبډلې پخواني لوبډلمشر وسیم اکرم ته هم په دغو سیالیو کې د روزونکي دنده وړاندیز شوې وه، خو نوموړي د خپل هېواد د کرکټ بورډ د تګلارې د درناوي له امله دغه وړاندیز رد کړی دی.
بلخوا، د پاکستان د ملي لوبډلې پخوانی تېز توپاچوونکی محمد عامر د افغانستان له غوره لیګ سره یوځای شوی او د برېتانیا تابعیت لرونکي لوبغاړي په توګه په دغو سیالیو کې ګډون کوي.
همدارنګه، د پاکستان دوه نور پخواني کرکټ لوبغاړي اظهر محمود او وقار یونس هم د افغانستان په غوره لیګ کې دندې منلې دي.
اظهر محمود د پکتیا لوبډلې د مشر روزونکي او وقار یونس د همدې لوبډلې د سفیر په توګه ټاکل شوي دي.
د یادونې ده، چې د پاکستان کرکټ بورډ د خپلو ملي لوبغاړو لپاره د دې لیګ په سیالیو کې د ګډون په موخه د نهممانعت اسناد نه صادروي، خو یادو پخوانیو لوبغاړو په بېلابېلو مسلکي دندو کې له افغان لیګ سره همکاري منلې ده.