د بالیووډ مشهور لوبغاړی ټایګر شروف په ممبۍ کې د وسلهوالو له ډزو روغ وتلی، خو د پېښې پر مهال د هغه موټر چلوونکی او یو بل کس ټپیان شوي دي.
پولیس وايي، درې تنه پر موټرسایکل سپاره کسان د جوهو په سیمه کې د شروف پر موټر ډزې کړې او له سیمې تښتېدلي دي.
د هند د رسنیو د راپورونو له مخې، ټایګر شروف له یوه ځایه د وتلو پر مهال په خپل موټر کې و چې برید پرې وشو.
شروف ته زیان نه دی اوښتی، خو د هغه موټر چلوونکی په لاس او یو بل کس د مرمۍ له امله ټپیان شوي دي.
پولیسو د پېښې د عاملانو د موندلو لپاره ګڼې ډلې ګومارلې دي.
تر برید وروسته په ټولنیزو رسنیو کې یو پیغام خپور شوی چې پکې د لارنس بشنوي ډلې په نوم د برید مسوولیت منل شوی او ادعا شوې چې ټایګر شروف ته مخکې هم خبرداری ورکړل شوی و.
په دغه پیغام کې د ممبۍ د فلمي صنعت هغو کسانو ته هم ګواښ شوی چې له مشهور لوبغاړي سلمان خان سره کار کوي، خو د ممبۍ پولیسو تر اوسه د دې ډلې ادعا په رسمي ډول نه ده تایید کړې او د پیغام د اصالت ارزونه روانه ده.
پولیسو د برید د څرنګوالي، د وسلهوالو د پېژندنې او د پېښې د اصلي انګېزې په اړه تحقیقات پیل کړي دي.
د چارواکو په وینا، تر اوسه یوازې د یوې ډلې له خوا د مسوولیت ادعا شوې او دا لا نه ده ثابته شوې چې برید په رښتیا هم د همدې ډلې له خوا ترسره شوی دی.