د سعودي چارواکي وایي په مکه مکرمه کې د یوه جومات دننه د «فحاشۍ» په جرم پر یوه بنګلهدېشي سړي او یوې ښځې د اعدام سزا عملي شوې ده.
د سعودي دولتي خبري اژانس د کورنیو چارو وزارت په حواله ویلي، نذر الاسلام عبدالبصیر او سيتي اختر له نیول کېدو وروسته محکمې ته وړاندې شوي وو.
د وزارت په وینا، محکمې دواړه پر لګېدلو تورونو مجرم پېژندلي او د جرم د جديوالي او د جومات د حرمت د نقض له امله یې د مرګ تعزیري سزا ورته اورولې وه.
چارواکي وايي، د استیناف محکمې او سترې محکمې هم لومړنۍ پرېکړه تایید کړې وه او د شاهي فرمان له صادرېدو وروسته د تېرې چهارشنبې په ورځ، د اکتوبر پر ۱۴مه، سزا عملي شوه.
سعودي چارواکو د پېښې د څرنګوالي، د سزا د صادرېدو د وخت او د هغه جومات په اړه نور معلومات نه دي خپاره کړي چې پېښه په کې شوې وه.