د افغانستان په اړه د مسکو فارمټ اتمه غونډه د کابل او اسلاماباد ترمنځ د اختلافاتو له امله د ګډې پایلیک اعلامیې له تصویب پرته پای ته رسېدلې ده.
روسیې انترفاکس خبري اژانس راپور ورکړی چې د غونډې ګډونوالو د دغه ډول مشورو د دوام پر اړتیا ټینګار کړی، خو د وروستي سند پر ځینو برخو هوکړې ته نه دي رسېدلي.
د افغانستان لپاره د روسیې ځانګړي استازي ضمیر کابلوف ویلي، د طالبانو حکومت پلاوي په وروستي سند کې د افغانستان د ترهګرۍ په تړاو له پرلهپسې یادونو سره مخالفت کړی دی.
د هغه په وینا، د طالبانو حکومت پلاوي ویلي، چې د تېر کال په پرتله د کابل او اسلاماباد په اړیکو کې وضعیت بدل شوی او سږکال د سند دغه برخه ورته د منلو وړ نه ده.
کابلوف ویلي، مسکو له دې دریځه خواشینی دی، ځکه د ده په وینا، ورته عبارتونه د تېر کال په سند کې هم شامل وو.
نوموړي ټینګار کړی چې د مسکو فارمټ به خپلو فعالیتونو ته دوام ورکړي، خو دا چوکاټ د افغانستان او پاکستان ترمنځ د دوهاړخیزو اختلافاتو د هواري لپاره نه دی جوړ شوی.
نوموړي زیاته کړې چې دغه بهیر حتی د ګډې اعلامیې له خپرولو پرته هم دوام کولی شي.